د ټولګټو وزارت تخنيکي مرستيال د کابل – جلال آباد لویې لارې دویم لین سړک له کاري بهیر او له اړونده ټولپلازاوو څخه لیدنه وکړه
د ټولګټو وزارت تخنيکي مرستيال محترم الحاج مولوي عبدالکريم فاتح ننګرهار ولایت ته د سفر په ترڅ کې د کابل – جلال آباد لویې لارې د دويم لین سړک له کاري بهیر او له اړونده ټولپلازاوو څخه په داسې حال کې لیدنه وکړه چې د ننگرهار ولایت د ټولګټو رئيس محترم مولوي احمد احمدي يې هم ملتيا کوله.
د ياد وزارت تخنيکي مرستيال د سړک د دغې برخې څخه د لیدنې په ترڅ کې، د قراردادي شرکتونو مسوولينو، تخنیکي ټیمونو او انجنیرانو ته د کار د غوره کيفيت، چټکیا او په ټاکلي وخت د بشپړېدو په اړه لازمې لارښوونې وکړې.
د یادونې وړ ده، چې د ټولګټو وزارت د کابل – جلال آباد لویې لارې اړوند د دویم لین سړک چې شاوخوا ۱۴۷ کیلومتره اوږدوالی لري، د لومړي سکشن ۲۲ کيلومتره سړک د رغونې کار یې څه موده وړاندې له خصوصي سکټور سره د تړون له مخې پیل کړی او مالي لګښت یې د ټولپلازا له محصول څخه ورکول کیږي.
همدارنګه، نوموړي د يادې لویې لارې له اړوندو ټولپلازاوو څخه د ليدنې ترڅنګ د يادو ټولپلازاوو کار کوونکو ته د ستونزو د حل په موخه لار ښوونه وکړه، چې له درنو هېوادوالو او موټر چلوونکو سره له ښو اخلاقو څخه کار واخلي او د عوايدو راټولولو په برخه کې امانت داري وکړي؛ تر څو هېوادوال ډاډ ترلاسه کړي، چې پيسې يې د ياد سړک په اساسي رغونه لګول کېږي.
