د پروان – بامیان د ۲۰ کیلومتره سړک د داغګيرۍ چارې د ۳۲ میلیونه افغانیو په ارزښت پیل شوې
د ا.ا.ا د ټولګټو وزارت له لورې، د پروان – بامیان د ۲۰ کیلومتره عمومي سړک، چې د پروان ــ بامیان ولایتونو د شیبر کوتل څخه د پروان ولایت تر شیخ علي ولسوالۍ پورې رسيږي؛ د ۳۲ میلیونو افغانیو په ارزښت يې د داغګيرۍ چارې د پروان ولايت د مرستیال والي محترم الحاج مولوي محمد ابوالوفاء عثماني، د ټولګټو رئيس محترم مولوي عزت الله عارف او ځايي مسؤلينو په حضور کې رسماً پیل شوې.
د پروان د ټولګټو ریاست مسؤلین وایي، چې ياد سړک ۲۰ کیلومتره اوږدوالی لري، چې چارې يې د ۳۲ میلیونه افغانیو په ارزښت له خصوصي سکتور سره قرارداد شوي او بودجه يې د ا.ا.ا د ټولګټو وزارت لخوا تمویل کیږي، چې د پنځو مياشتو په موده کې به يې کار بشپړ او ګټې اخیستنې ته وسپارل شي.
د پروان ولایت مرستیال والي الحاج مولوي محمد ابوالوفاء عثماني د سړکونو د رغونې او ترمیم پر اهمیت ټینګار وکړ او ویې ویل: "د سړکونو بیارغونه او اعمار زموږ له مهمو لومړیتوبونو څخه دی. موږ هڅه کوو چې د موجودو امکاناتو او اړوندو ادارو د همکارۍ له لارې ویجاړ شوي سړکونه بېرته ورغوو او د خلکو د هوساینې لپاره لازم شرایط برابر کړو."
د پروان ولایت د شیخ علي ولسوالۍ اوسېدونکو د یاد سړک د داغګیرۍ د کار له پیل څخه خوښي څرګنده کړه او ويې ويل، چې د دې پروژې پلي کېدل به د سیمې خلکو ته د کاري فرصتونو برابرولو ترڅنګ د تګ-راتګ ستونزې هم تر ډېره هوارې کړي.
لکه څنګه چې اوسمهال د سالنګونو لويې لارې د بيارغونې چارې جريان لري، په همدې اساس يوشمېر باربري وسايط له همدې لارې تګ راتګ کوي. د یادې پروژې بشپړېدل به د سيمې د اوسېدونکو ترڅنګ د ملي او سیمه ییز ترانزیټ په برخه کې هم ګڼې اسانتیاوې رامنځته کړي.
ټولګټو وزارت هڅه کوي، چې د هیواد د لویو لارو، فرعي سړکونو، اوسپنې پټلۍ او ترانزیټي دهلیزونو د رغونې، ترميم او بیارغونې له لارې هېوادوالو ته د تګ راتګ په برخه کې لازمې اسانتیاوې رامنځته کړي.
