ټولګټو وزارت د فساد او په دندو کې د ناغيړۍ په تور د لويو لارو د تلو ټول کارکوونکي له دندو ګوښه کړل

د ټولګټو وزير انجينر نجيب الله يمين د ټرانسپورټي اتحاديو، عامو خلکو او موټروانانو له پرله پسې شکايتونو وروسته د څېړنې يو پلاوی وګماره چې په پایله کې یې د تلو د یو شمېر مامورینو پر ګوښه کېدو پرېکړه وشوه.

له دې ډلې څخه چې پر کومو کسانو د فساد ثبوتونه موجود دي، هغوی به عدلي او قضایي ارګانونو ته هم د څېړنې لپاره ور وپېژندل شي.

د دې تر څنګ د تلو يو شمېر مامورین له دې کبله هم ګوښه شوي چې په تشکیل کې بدلون راغلی او د دندو لایحه يې بدله شوې ده.

.ياد کارکوونکي نه یوازې دا چې په رشوت اخيستنه متهم و، بلکې سړکونو ته یې هم د دې فساد له کبله زیان اړولی و، چې زیات وزن لرونکو ټرانسپورټي وسايطو ته یې پر سړکونو د تګ - راتګ اجازه ورکوله.

.ټولګټو وزارت به د یوه راڼه بهیر له لارې د ګوښه شويو کارکوونکو پر ځاى ډېر ژر هېواد ته ژمن مسلکي کسان په دندو وګماري او تر څنګ یې د تلو د ډیجیټل کېدو لپاره هم پوره هڅه کوي تر څو د فساد مخنیوی وشي