باميان: د غجور کلي د پُل او اتصالي سړک رغنيزې چارې ۷۷ سلنه پرمختګ لري
د باميان ولايت په ورس ولسوالۍ کې د ۱۵ متره کانکرېټي پل او ۳۰۰ متره جغلي سړک د جوړولو پروژه چې د غجور کلي په ګيروجوی سيمه کې روانه ده؛ رغنيزې چارې يې ۷۷ سلنه بشپړې شوې دي.
ياده پروژه د څه باندې ۱۰ ميلونه افغانيو په ارزښت د محل له پرمختيايي شورا سره قرارداد شوې، چې د ټولګټو وزارت “ د کليوالي لارجوړونې ملي پروګرام” له لارې عملي کېږي او مالي لګښت يې د افغانستان دولت له ملي بوديجې څخه ورکړل شوی.
د دغې ساختماني پروژې تطبيق به نه يوازې د منطقې په کچه اتصال رامنځته کړي، بلکې لا د جوړېدو په مرحله کې يې د سيمې خلکو ته د ۸۵۸۱ کاري ورځو په اندازه د روزګار زمينه هم برابره کړېده.
ياده دې وي، چې د دغه پل په جوړېدو سره به د زردمي کلی له کرستو کرګي بازارګوټي او له همدې لارې د ډايکنډي ولايت له اشترلي ولسوالۍ سره وصل شي، چې ورسره به د ورڅېرمه کليو او د لارې پر مسير د پرتو خلکو ټرانسپورټي ستونځې هواري شي.
د غوایي ۱۵مه ۱۴۰۰
د ټولګټو وزارت مطبوعاتي څانګه
