د منځني ختیځ هیوادونو د سیمه ییزې ریل پټلۍ ټولنې پنځه دېرشمه غونډه په ایران کې ترسره شوه
د منځني ختیځ د اوسپنې پټلۍ ټولنې د سیمه ییز فورم (UIC RAME) پنځه دېرشمه غونډه د ایران په اسلامي جمهوریت کې د غړو هیوادونو د لوړ پوړو چارواکو او د اوسپنیزې کرښې د نړیوالې اتحادیې د استازو په شتون کې ترسره شوه.
په دغه ناسته کې د ټولګټو وزارت د اوسپنې پټلۍ مرستیال محترم مولوي محمداسحاق صاحب زاده د یو پلاوي په مشرۍ د ا.ا.ا په استازیتوب ګډون او خبرې وکړې.
په یاده غونډه کې، د ټولګټو وزارت د اوسپنې پټلۍ مرستیال، د افغانستان د اوسپنې پټلۍ په برخه کې یو کلنو فعالیتونو او لاسته راوړنو ته د اشارې ترڅنګ زیاته کړه، چې د افغانستان د اوسپنې پټلۍ شبکې د پراختیا، د روانو پروژو، د انتقالاتو پر زیاتوالي او راتلونکو پلانونو په اړه هر اړخیز معلومات وړاندې کړل.
هغه د سیمه ییزې همکارۍ، د توکو د لیږد رالیږد اسانتیاوو او د منځنۍ اسیا، جنوبي اسیا او لویدیځو هېوادونو د نښلولو د څلور لارې په توګه د افغانستان د رول پر اهمیت هم ټینګار وکړ.
د اوسپنې پټلۍ مرستیال زیاته کړه «په تېر کال کې د ننګونو سره سره، افغانستان د اوسپنې پټلۍ د جوړولو، ترمیم او مدیریت په برخه کې د پام وړ لاسته راوړنې لري، او زیاتې پروژې لکه د خواف-هرات اوسپنې پتلۍ د کارجریان، د مزار-هرات د اوسپنې پټلۍ سروې، د هرات-کندهار مسیر تفصيلي سروې او ډیزاین، د افغان-ترانس پروژه او د سیمه ییز دهلیز د اتصال فني مطالعات په افغانستان کې د پرمختګ په حال کې دي.»
همدارنګه، د غونډې په څنډه کې، د ټولګټووزارت د اوسپنې پټلۍ مرستیال د ایران اسلامي جمهوریت د ریل پټلۍ ادارې له مشر ډاکټر جبار علي ذاکر سره وکتل او د دواړو هیوادونو ترمنځ د دوه اړخیزو همکاریو، د خواف-هرات اوسپنې پټلۍ څخه د انتقالاتو د زیاتوالي او د دا ډول همکاریو د پراخولو په اړه یې خبرې او ټینګار وکړ.
د یادونې وړ ده، چې په دې غونډه کې د افغانستان فعال ګډون د سیمه ییزې همکارۍ د پراختیا او د سیمې د ټرانزیټ اتصال په برخه کې د اغیزمن رول لوبولو لپاره د هغه ژمنتیا ښیي.
