د ټولګټو وزارت یوه پلاوي د کابل – غزني دویم لین سړک له کاري بهیر څخه لیدنه وکړه
د ټولگټو وزارت د وزیر محترم الحاج ملا محمد عیسی ثاني د هدایت پر اساس د یاد وزارت د قوای کار رئیس محترم مولوي کفایت الله حق شناس او د ترانسپورت او میخانیکي چارو د تنظیم رئیس محترم مولوي سعد الدين معتصم باالله، چې یوه تخنیکي پلاوې یې هم ملتیا کوله د کابل – غزني لویې لارې د دویم لین سړک له کاري بهیر څخه له نږدي لیدنه وکړه.
یاد پلاوي د دغه سړک دریو برخو د کاري بهیر ارزونه وکړه او د پروژې د تطبیق کوونکو ټیمونو او قراردادي شرکتونو ترسره شوې چارې یې وستایلې او هغوی ته یې لارښوونه وکړه چې دیادې پروژې چارې دې په ټاکلي وخت او غوره کیفیت ترسره کړي او له ارزونې وروسته یې د یاد سړک د کاري بهیر راپور د ټولګټو وزارت محترم مقام سره شریک کړ.
دا په داسې حال کې ده، چې د ا.ا.ا د ټولګټو وزارت له لوري د کابل - غزني لویې لارې اقتصادي او ټرانزيټي اهمیت ته په کتو او د پخواني لین سړک څخه د ګڼې ګوڼې د راکمېدو او ترافیکي پېښو د مخنیوي په موخه د یاد سرک رغنیزې چارې په بېلا بېلو برخو کې پیل کړې وې، چې دا مهال له مختلفو فزیکي پرمختګونو سره جریان لري.
