د کابل – میدان ښار د ۸ کیلومتره سړک د ترمیم اساسي چارې رسماً پیل شوې
د کابل – میدان ښار د ۸ کیلومتره سړک د ترمیم اساسي چارې رسماً پیل شوې
د کابل ښار د کمپنۍ له پُل څخه د میدان ښار په لور د ۸ کیلومتره سړک د ترمیم ( قیرریزي ) چارې د ټولګټو وزارت د تخنیکي مرستیال سید ادریس میر، د کابل ولایت د ټولګټو رئیس مفتي محمد هارون او د دې وزارت یو شمیر تخنیکي رئیسانو په شتون کې رسماً د پټۍ په پرې کولو سره پیل کړې.
د ټولګټو وزارت سرپرست تخنیکي مرستیال د دې پروژې د پیل په مراسیمو کې وویل: د ا. ا. امــــارت د ټولګټو وزارت هغو سړکونو او پلونو ترمیم ته لومړيتوب ورکوي چې ډیري برخې یې تخریب شوي دي او د خلکو په تګ راتګ کې یې ستونزې رامنځته کړي دي.
هغه زیاته کړه چې د کابل – میدان ښار ۸ کیلومتره سړک اساسي ترمیم (قیرریزي) د څه باندې ۳۰ میلیونه افغانیو په ارزښت د ټولګټو وزارت او هیواد نګین خصوصي ودانیز شرکت ترمنځ تړون شوی چې کار به یې په راتلونکي ۳۵ ورځو کې بشپړ شي.
د ټولګټو وزارت تخنیکي مرستیال همدارنګه وویل: د ا. ا. امــــارت له لوري د زابل – میدان وردګو لویې لارې میلینګ کاري او ترمیم، د سالنګ لویې لارې د ۳۰ کیلومتره ترمیم او د زابل ولایت د شهر صفا ولسوالۍ اړوند د دریو لویو پلونو د ترمیم چارې له وړاندې پیل کړي وې چې دا مهال یې کار دوام لري او د سړکونو د ترمیم او بیارغونې دا لړۍ به د هیواد ټولو ولایتونو ته وغځول شي.
ورپسې د ټولګټو وزارت د ساتنې او څارنې معینیت مشاور حافظ منور خبرې وکړې ویي ویل: د ساتنې او څارنې معینیت له خوا د سړکونو ټولي هغه برخې چې د خلکو په تګ راتګ او د ژمي په موسم کې یې ترانسپورتي ستونزې رامنځته کړي، د ترانسپورتي ستونزو د حل په موخه د ټولګټو وزارت له لوري اساسي پلانونه نیول شوي.
هغه زیاته کړه چې د کابل – میدان ښار سړک ټولټال ۲۴ کیلومتره اوږدوالی لري چې له ډلي یې د ۸ کیلومتره سړک د ترمیم چارې نن پیل شوې او پاته ۱۶ کیلومتره په تخنیکي پړاونو کې دی چې راتلونکي کې به یې عملي کار پیل شي.
په پای کې د کابل ولایت د ټولګټو رئیس مفتي محمد هارون خبرې وکړي او په ټاکلي وخت، غوره کیفیت، د تخنیکي مشخصاتو مطابق د پروژې له پلي کیدو څخه ډاډ څرګند کړ او د سیمې له خلکو څخه يې د یادي پروژې په تطبیق کې د مرستې وغوښته.
د ټولګټو وزارت رسنیز دفتر
