په غزني ولایت کې د مقر – ناوې ۲۰.۵ کیلومتره سړک د رغونې چارې د څه باندې ۴۴۷.۹ میلیونه افغانیو په ارزښت پیل شوې
د ټولګټو وزارت له لوري په غزني ولایت کې د مقر – ناوې سړک د رغونې چارې د څه باندې ۴۴۷.۹ میلیونه افغانیو په ارزښت د غزني ولایت د والي محترم الحاج ملا عبدالصمد جاوید، د یاد ولایت د ټولګټو رئیس محترم مولوي عبدالقدیر بلال او یو شمېر سیه ییزو مسئولینو په شتون کې پیل شوې.
دغه سړک ۲۰.۵ کیلومتره اوږدوالی او ۱۲.۳ متره پلنوالۍ لري چې ۷.۳ یې په اسفالټي او د سړک دواړو خواوو ته ۲.۵ متره شولډرونه په نیمه پاخه ډول رغول کیږي، د یاد سړک په اوږدو کې د ۴۷ مصنوعي ساختمانونو او دوه پایې پلونو د رغونې کار هم شامل دی، چې رغنیزې چارې به یې د ۱۸ کاري میاشتو په موده کې بشپړې شي.
د مقر – ناوې سړک د کار په جریان کې د سیمې یو شمېر هېوادوالو ته د کار زمینه برابره شوې ده او په رغیدو سره به یې د غزني ولایت د مقر، ناوې، ګیلان ولسوالیو او زابل او پکتیکا ولایتونو د اوسېدونکو د تګ راتګ او کرنیزو توکو د انتقالاتو ستونزې هوارې شي.
