د قیصار–لامان سړک د ٥٠ کیلومتره برخې د رغونې چارې پیل شوې
د قیصار–لامان سړک د یوې برخې چې ۵۰ کیلومتره اوږدوالی لري د رغونې چارې تېره ورځ د ریاستالوزراء عالي مقام د اقتصادي مرستیال محترم ملا عبدالغني برادر آخند او یو شمېر ځايي مسؤلینو په شتون کې پیل شوې.
دا پروژه د څه باندې ٤.٦ میلیارده افغانیو په ارزښت د ټولګټو وزارت او آریاخان افغان ساختماني شرکت ترمنځ قرارداد شوې ده، او ټاکل شوې، چې په درې کلونو کې بشپړه او ګټې اخیستنې ته وسپارل شي.
د قراردادي شرکت مسؤلینو ډاډ ورکړی چې یاده پروژه به له ټاکلي وخته مخکې او د ټولګټو وزارت وزارت د تخنیکي مشخصاتو سره سمه بشپړه کړي.
د سړک دغه برخه د بادغیس ولایت د مقر ولسوالۍ څخه پیل کېږي او د همدې ولایت د بالامرغاب ولسوالۍ پر لور غځېږي، چې بودیجه یې د ا.ا.ا د ټولګټو وزارت له لوري ور کول کېږي.
د قیصار–لامان سړک د هېواد د حلقوي سړک یوه برخه ده او د ا.ا.ا ټولګټو وزارت له مهمو بنسټيزو پروژو څخه ګڼل کېږي، چې د فاریاب ولایت څخه پیل او د بادغیس ولایت د یو شمېر ولسوالیو څخه په تېرېدو هرات ولایت ته رسیږي.
د یادونې وړ ده، چې د دغه پروژې د کار په جریان کې به یو شمېر مسلکي او غیر مسلکي کارګرو ته د کار زمینه برابره شي، او په بشپړېدو سره به یې د خلکو د تګ راتګ، د سوداګریزو توکو او کرنیزو محصولاتو د لېږد - رالېږد په برخه کې ګڼ شمېر اسانتیاوې رامنځته شي او د انتقالاتو لګښتونه به راکم شي.
دا په داسې حال کې ده، چې د ټولګټو وزارت تېر کال د یادې لویې لارې د ۲۵ کیلومتره برخې اساسي رغوونې چارې د فاریاب ولایت له لوري پیل کړې وې، چې دا مهال په عملي ډول جریان لري.
