د ټولګټو وزارت د یو شمیر ولایتي ریاستونو ورځني فعالیتونه
هیوادوالو ته د غوره ترانسپورتي اسانتیاو د برابرولو په موخه؛ د ټولګټو وزارت ټول ولایتی ریاستونه هره ورځ د هیواد په بېلابیلو سیموکې له شته ماشینرۍ او تخنیكی پرسونل څخه په ګټې اخیستلو سره، د سړکونو، پلونو او پُلګوټو په ترمیم او بیارغونه بوخت وي. همداراز، له شته سړكونو او پلونو څخه په دوامداره توګه ساتنه او څارنه كوي. په همدې موخه، د یاد وزارت د یو شمېر ولایتي ریاستونو د نن ورځې فعالیتونو په لاندې ډول دي:
سالنګونه: د سالنګ لویې لارې اړوند په شمالي سالنګ کې د دوه کیلومتره سړک د کانکریټ اچونې کار په چټکۍ سره دوام لري.
پکتیکا: د پکتيکا ولايت د سرحوضې ولسوالۍ اړوند په پړاو سيمه کي د یوه پایه (۷۰) متره پل د سیلابونو له احتمالي ګواښ څخه خوندې شو او د اوبو مسیر له خاورو څخه د ډکو بوجونو په واسطه بد کړای شو. دغه راز، په یاد ولایت کې د ښرنې – انګور اډې پر مسیر یو شمیر پلګوټي له خاورو او شګو څخه پاک کاري شول.
بدخشان: د بدخشان ولایت په دهندره سیمه کې د یوه پایه ویجاړ شوي پُل د ترمیم کار د سیمې د خلکو په مرسته جریان لري، د یاد پل د ویجاړېدو له امله د شهر بزرګ ولسوالۍ سړک له مرکز سره بند و، چې د کار له بشپړېدو سره به یاده ترانسپورتي ستونزه هواري شي. په ورته وخت کې، د کشم ولسوالۍ په مادابه سیمه کې د یوې پایې تلې (ترازو) لپاره د ودانۍ جوړلو چارې هم دوام لري.
لغمان: د هیواد په ختیځ لغمان ولایت کې د کابل – جلال آباد عمومي سړک د شولډرونو د ترمیم او پر دغه مسیر د ویالو، واشونو او پلګوټو د پاکولو کار دوام لري.
دټولګټو وزارت رسنیز دفتر
