د کونړ په شلتن ولسوالۍ کې د یوه پایه پل ګټې اخیستنې ته وسپارل شو
د کونړ په شلتن ولسوالۍ کې یوه پایه پُل د بیارغونې کار بشپړ او گټې اخیستنې ته وسپارل شو، د یاد پُل په جوړیدلو سره د شلتن ولسوالۍ د شاوخوا ۱۹ زره کورنیو د تگ راتگ ستونزې آوارې شوې دي.
دغه پل چې ۱۰۲ متره اوږدوالی او ۶ متره سور او ۱۰ ميلونه ډالر ارزښت لري، د ټولگټو وزارت له لوري ورغول شو.
په همدې موخه جوړه شوې غونډه کې د ټولگټو وزارت د دفتر رئیس مفتي امیر عبدالله، د یاد وزارت ویاند مولوي حمیدالله مصباح، د وزارت یوشمېر رئیسانو، د کونړ د والي مرستیال او د دغه ولایت امنیه قومندان او د سیمې یوشمېر نورو مسؤلینو، دیني عالمانو او مخورو گډون کړی وو.
د غونډې په پیل کې مفتي احسان الله فاتح او حاجي ملک سلامت خان د شلتن ولسوالۍ د خلکو په استازیتوب خبرې وکړې او د ټولگټو وزارت څخه مننه وکړه.
ورپسې د کونړ د والي مرستیال مولانا عبدالله او د دې ولایت امنیه قومندان مولانا عبدالحق حقاني خبرې وکړې، د اسلامي نظام څخه ملاتړ او ساتنه یې د ټولو افغانانو وجیبه وبلله؛ هغوی همدارنگه د اسلامي امارت له مشرانو څخه وغوښتل چې د کونړ ولس ته ډېره پاملرنه وکړي.
دغه راز د غونډې په بهیر کې د ټولگټو وزارت د دفتر رییس مفتي امیر عبدالله په خپلو خبرو کې، خلکو په یووالي ټینگار وکړ او له خلکو یې وغوښتل، چې د پراختیایي پروژو په پلي کولو کې له دغه وزارت سره همکاري وکړي، هغه زیاته کړه: ټولگټو وزارت به په دې ولایت کې د نيمگړو پروژو کار بشپړ کړي.
د یادونې وړ ده، دغه پل د تخنیکي ستونزو او د اوبو د ډېر فشار له امله نړېدلی و د کونړ ولایت شیګل، اسمار، ناړۍ او شلتن ولسوالۍ د دې ولایت له مرکز اسعد آباد ښار سره نښلوي.
