د کابل – کندهار لویې لارې اړوند د دوو محرابه مسجدونو رغنیزې چارې په مجموعي ډول د څه باندې ۶۲ میلیونه افغانیو په ارزښت بشپړې او ګټې اخیستنې ته وسپارل شوې
د کابل – کندهار لویې لارې اړوند د میدان وردګو ولایت په سیدآباد ولسوالۍ کې یو محراب مسجد رغنیزې چارې د ۳۲.۵ میلیونه افغانیو په ارزښت او د زابل ولایت اړوند د کلات مسجد رغنیزې چارې د ۳۰.۲ میلیونه افغانیو په ارزښت د ا.ا.ا د ټولګتو وزارت لخوا درنو هېواد والو او موټرچلوونکو ته د اسانتیاوو برابرولو په موخه له خصوصي سکتور سره قرارداد شوې وې ، چې دا همال یې چارې بشپړې او یاد مسجدونه د یو لړ مراسمو په ترڅ کې ګټې اخیستنې ته وسپارل شول.
د دغو مسجدونو د پرانیستې په مراسمو کې د ټولګټو وزارت د سړکونو د ساتنې او څارنې معین محترم الحاج مولوي محمد اسماعیل غزنوي، یو شمېر نورو مسؤلینو، علماوو او قومي مخورو ګډون کړی و.
د مراسمو په لړ کې د ټولګټو وزارت د سړکونو د ساتنې او څارني معین محترم الحاج مولوي محمد اسماعیل غزنوي په خپلو خبرو کې وویل، په لویو لارو کې د مسافرینو لپاره د مسجدونو جوړول یوه مهمه اړتیا ده او د ټولګټو وزارت هڅه کوي چې په ټول هېواد کې د سړکونو، پلونو، مسجدونو او نورو ترانسپورتي زیربناوو د جوړولو او بیارغونې له لارې خلکو ته لا ډېرې اسانتیاوې برابرې کړي.
د یادونې وړ ده، ټولګټو وزارت د کابل -کندهار او کندهار -هرات لویې لارې په اوږدو کې د ۱۴ محرابه مسجدونو د جوړولو چارې پیل کړې وې، چې دا مهال د یادو مسجدونو سربېره، د غزني د آب بند ولسوالۍ، د کندهار ولایت د دامان ولسوالۍ، د کندهار ولایت د میوند بالا او د هلمند ولایت د نادعلي ولسوالۍ د مسجدونو چارې بشپړې شوې دي او د پاتې نورو مسجدونو کارونه به چټکۍ سره جریان لري.
