د کابل - ګردیز لویې لارې د ٧٦ کیلومتره سړک د داغگیرۍ چارې پیل شوې
د ټولګټو وزارت له لوري د کابل - ګردیز لویې لارې اړوند د ٧٦ کیلومتره سړک د داغگیرۍ چارې د ١٧.٤ میلیونه افغانیو په ارزښت د لوګر ولایت د مرستیال والي الحاج محمد انور دین پرور، د یاد ولایت د ټولګټو د رئیس محترم مولوي جنت ګل سراج، یو شمېر سیمه ییزو مسؤلانو او قومي مخورو په شتون کې پیل شوې.
یاده پروژه د ټولګټو وزارت او خصوصي سکټور ترمنځ د ١٧ میلیونه او ٤٠٠ زره افغانیو په ارزښت قرارداد شوې ده، چې د ترمیم او داغگیرۍ کار به یې د درې میاشتو په موده کې بشپړ شي.
د یاد سړک د کار په بشپړېدو سره به د درنو هېواد والو په ځانګړي ډول د یاد مسیر څخه د تلوونکو مسافرو د تګ راتګ، د کرنیزو او سوداګریزوتوکو د انتقال ستونزې د پخوا په پرتله هوارې شي.
ټولګټو وزارت تل هڅه کوي، چې د لویو لارو، سړکونو، اوسپنې پټلۍ، پلونو او پُلګوټو په ترمیم، رغونې او بیارغونې سره درنو هېواد والو ته د تګ راتګ او د کرنیزو او سوداګریزو توکو د هوسا او ډاډمن انتقال په برخه کې آسانتیاوې رامنځته کړي.
