د ټولګټو چارو وزير: د نن ماشوم د سبا رهبر دی
د ماشومانو نړیواله ورځ نن د تولګټو وزارت په وړکتون کې ونمانځل شوه
د یادې ورځې په موخه د ټولګټو وزارت وزیر انجنیر نجیب الله یمین ټولو میندو، پلرونو، د کورنیو غړو او ټولو ماشومانو ته مبارکي وویله او هم یې د ماشومانو شتون او هغوی ته ارزښت ورکول مهم وبلل.
ښاغلي يمين د دې ورځې په مناسبت ماشومانو ته د يو شمير ډاليو تر څنګ د سيد جمال الدين افغان کتاب ډالۍ کړ له مېندو او پلرونو څخه يې وغوښتل چې خپلو ماشومانو ته د افغانستان ستر او تاريخي شخصيتونه ور وپيژنې او په داسې روحيه يې وروزې چې په راتلونکي کې د هغوی پر لار راوان شې.
د ټولګټو وزیر د خپلو خبرو پرمهال څرګنده کړه، چې د ماشومانو سالمه روزنه د هېواد غوره راتلونکی تضمینوي، چې باید ځانګړې پاملرنه ورته وشي.
نوموړي په همدې حال کې د وزارت اړوند وړکتون مسوولینو ته لارښوونه وکړه، څو د ماشومانو روغتیا، علم او روزنې ته تربل هرڅه وړاندې پام وکړي او هم یې په هېوادنۍ مینه وروزي، ترڅو له خپل تېر پېښلیک او مشاهیرو خبر شي.
د یادولو وړ ده، چې د ټولګټو وزارت په اډانه کې د ماشومانو لپاره منظم وړکتون شتون لري، چې پکې د استادانو له لوري ماشومانو ته دا مهال روزنه ورکول کېږي.
