د کندهار ولایت په دامان ولسوالۍ کې د سړک چارې ۲۲ سلنه کاري پرمختګ لري
د سړک دغه پروژه چې څه باندې ۴ کیلومتره اوږدوالی او ۵ متره پلنوالی لري، د دامان ولسوالۍ له تریاکي بابا کلي پيل او د کابل کندهار تر عمومي سړک پورې غځېږي.
د یادې پروژې رغنیز کار د ټولګټو وزارت لخوا له یو خصوصي ودانیز شرکت سره لاس لیک شوی، چې ټول مالي لګښت یې د افغانستان دولت له پراختیایي بودیجې څخه چې اوس مهال یې رغنیزې چارې له ۲۲ سلنه کار پرمختګ سره دوام لري.
د دې سړک د رغنیز کار په بهیر کې به د سیمې اوسېدونکو ته په مستقیم او غیر مستقیم ډول ۳۱۵۷ کاري ورځې رامنځته شي او د کار له بشپړېدو سره به د انار باغ، تریاکي بابا او مهمند کلي له دامان ولسوالۍ او د کابل - کندهار له عمومي سړک سره ونښلي.
د یادولو وړ ده، چې د یاد سړک تر رغیدا وروسته به د اړوندو سیمو د وګړو لپاره د تګ راتګ په برخه کې د پخوا په پرتله لازمې آسانتیاوې رامنځته او د چاپېریال په ساتنه کې به د پام وړ رول ولوبوي.
