د کندهار - سپین بولدک د دویم لاټ سړک چارې ۷۵ سلنه پرمختګ لري
د کندهار - سپین بولدک دویم لاټ سړک ۳۹ کیلومتره اوږدوالی او ۱۱.۲ متره پلنوالی لري، چې اوس مهال یې رغنیزې چارې له ۷۵ سلنه کاري پرمختګ سره دوام لري.
د یاد سړک په اوږدو کې د ۲۴ او ۱۸۰ مترو په اوږدوالی سره دوه پایې پُلونه، ۶۶ پایې پُلګوټي او ۷ معبرونه هم شامل دي.
د کندهار سپین بولدک سړک، رغنیزې چارې د ټولګټو وزارت او یوه خصوصي ودانیز شرکت ترمنځ تړون شوي، چې مالي لګښت یې د هیواد له پراختیايي بودیجې څخه ورکول کیږي.
د سړک دا پروژه د افغانستان حکومت د مهمو پروژو له ډلي څخه ده، چې سویل لوېدیځ ولایتونه د چمن په سیمه کې له ډیورنډ فرضي کرښې سره نښلوي او د افغانستان او پاکستان تر منځ د سوداګرۍ او ټرانزیټ په پیاوړتیا کې مهم رول لري.
د دې پروژې د رغنیز کار په بهیر کې د سیمې اوسېدونکو ته کاري فرصتونه رامنځته شوي، چې د چارو له بشپړېدو سره به یې نه یواځې افغانستان له پاکستان سره ونښلي تر څنګ به یې د ټولنیزو چوپړتیاو ( ښوونیزو، روغتیایي او ښاري خدمتونو ته ) د خلکو لاس رسی اسانه شي.
د یادوني وړ ده، چې د سړک دا پروژه ټولټال ۷۹.۶ کیلومتره اوږدوالی لري، چې د دویم لین لومړی لاټ یې د ۴۰ کیلومترو په اوږدوالي سره مخکي ګټي اخیستني ته سپارل شوی دی.
