په هلمند کې د ۲۴ کیلو متره سړک د ترمیم کار د څه باندې ۲۲ میلیونه افغانیو په ارزښت جریان لري
دغه سړک، د هلمند ولایت له دوه لارې څخه پیل د ګرشک ولسوالۍ تر بازار پورې غځېدلی دی، چې ۲۴ کیلومتره اوږدوالی او د ۶ پایې پُلګوټو ترمیم په کې شامل دي.
د سړک د ترمیم دغه پروژه د ټولګټو وزارت او نوید نوري ساختماني او سړک جوړوني شرکت تر منځ د ۲۲ میلیونه افغانیو په ارزښت قرارداد شوې ده، چې لګښت یې د دغه وزارت له بودیجې څخه ورکول کېږي.
د یادې پروژې د کار پرمهال به د سیمې یو شمېر اوسېدونکو ته د کار زمینه برابره شي او د کار له بشپړېدو سره به یې؛ د ګرشګ ولسوالۍ د اوسېدونکو ترانسپورتي ستونزې هوارې شي او دغه راز به د پخوا په پرتله په اساني د لښکرګاه ښار ته تګ راتګ وکړي.
