د کابل – هرات لویې لارې اړوند د ۱۴ محرابه مسجدونو ودانیزې چارې د څه باندې ۴۶۷.۷ میلیونه افغانیو په ارزښت له بېلابېلو فزیکي پرمختګونو سره جریان لري
د عالیقدر امیر المؤمنین شيخ القران والحدیث مولوي هبة الله آخوندزاده حفظه الله د حکم په اساس، ټولګټو وزارت د کابل - هرات لویې لارې اړوند د ۱۴ محرابه مسجدونو ودانیزې چارې چې له ډلې يې ۶ محرابه مسجدونه د کابل – کندهار پر مسیر او ۸ محرابه مسجدونه د کندهار – هرات پر مسیر له بېلابېلو ودانیزو شرکتونو سره د ۴۶۷۷۲۶۲۱۱.۵ افغانيو په ارزښت قرارداد کړې وې، دامهال یې ودانیزې چارې په چټکۍ سره جریان لري.
یاد وزارت د کابل – کندهار لویې لارې اړوند ( په میدان وردګو ولایت کې د سید آباد ولسوالۍ مسجد د ۳۵ میلیونه افغانیو په ارزښت، په غزني ولایت کې د اندړو ولسوالۍ مسجد د ۳۴۱۳۶۰۰۰ افغانیو په ارزښت، په غزني ولایت کې د آب بند ولسوالۍ مسجد د ۳۴۲۹۳۴۳۱ افغانیو په ارزښت، په زابل ولایت کې د شاجوی ولسوالۍ مسجد د ۳۵۶۹۶۴۲۸ افغانیو په ارزښت او په یاد ولایت کې د مرکز قلات اړوند مسجد د رغونې چارې سږ کال د ۳۳۳۰۵۶۳۷ افغانیو په ارزښت ( او په کندهار ولایت کې د دامان ولسوالۍ مسجد رغنیزې چارې تیر کال د ۳۵۴۰۰۰۰۰ افغانیو په ارزښت، پیل شوې وې؛ دامهال له بېلابېلو فزیکي پرمختګونو سره جریان لري او د دامان ولسوالۍ د مسجد ودانیزې چارې ۸۰ سلنه پرمخ تللې دي.
دغه راز یاد وزارت د کندهار – هرات لویې لارې په اوږدو کې ( د کندهار ولایت اړوند د میوند ولسوالۍ مسجد د ۳۲۴۴۸۹۹۶ افغانیو په ارزښت، د هلمند ولایت د نادعلي ولسوالۍ مسجد د ۳۳۹۶۲۸۹۳ افغانیو په ارزښت، د واشېر ولسوالی مسجد د ۳۳۸۴۱۳۵۵ افغانیو په ارزښت، د فراه ولایت اړوند د ګلستان ولسوالۍ مسجد د ۳۲۶۳۲۶۸۴ افغانیو په ارزښت، د یاد ولایت اړوند فراه رود ولسوالی مسجد د ۳۱۵۱۰۹۲۳ افغانیو په ارزښت، د نیمروز ولایت د خاشرود ولسوالۍ مسجد د ۳۳۹۶۰۱۰۲ افغانیو په ارزښت، د هرات ولایت د شینډنډ ولسوالۍ مسجد د ۲۹۸۰۳۱۰۵ افغانیو په ارزښت، او د د یاد ولایت اړوند د ادرسکن ولسوالی مسجد رغنیزې چارې د ۳۱۷۳۴۹۵۳ افغانیو په ارزښت، د ټولګټو وزارت لخوا د بېلابېلو ودانیزو شرکتونو سره قرارداد شوې وې او دا مهال عملاً جریان لري، چې د هر یو مسجد ودانیزې چارې به د یو کال په موده کې بشپړې شي.
دا په داسې حال کې ده، چې د ټولګټو وزارت له لوري د عالیقدر امیر المؤمنین حفظه الله د ۱۴۴۴/۱۰/۱۳ نیټې د (۳۵۸۴) ګڼې حکم په اساس د لویو لارو په اوږدو کې د هر ۷۰ کیلومتره په واټن سره یو محراب مسجد (په ټول هېواد کې ۷۵ محرابه مسجدونه رغول کیږي)، چې د هر یو مسجد لپاره ۳ جریبه ځمکه ځانګړې شوې ده او په یو وخت کې به ۳۰۰ تنو لمونځ کوونکو چې له دې جملې څخه ۱۷۰ نارینه او ۱۳۰ ښځینه لمونځ کوونکي دي په جلا توګه د اوداسه او لمانځه ځایونه ولري.
۱۷ قوس د ټولګټو وزارت رسنیز دفتر
