په نوي کال کې د ټولګټو وزارت د پروژو د رغولو په تړاو مشورتي ناسته ترسره شوه
د ټولګټو وزارت سرپرست وزیر محترم الحاج ملا محمد عیسی ثاني په ټول هېواد کې د یاد وزارت د پروژو د رغنیزو چارو د پیلیدو په هکله د يو شمېر ودانیزو او سړک جوړونې شرکتونو له مسئولینو، پانګه والو او د یاد وزارت تخنیکي رئیسانو سره مشورتي ناسته ترسره کړه.
په دغه ناسته کې په هېواد کې د ټولګټو وزارت اړوندو د پروژو د رغولو په تړاو هر اړخیزې خبرې اترې وشوې او د ټولګټو وزارت سرپرست وزیر د قراردادي او غير قراردادي شرکتونو مسؤلانو ته لارښونه وکړه، چې هر ډول چې لازمه وي، په همهغه ډول بايد په نوي کال کې د ټولګټو وزارت ټولې پروژې په ښه ډول تطبيق او د پلان سره سم يې کارونه بشپړ شي.
د قراردادي شرکتونو مسوولينو د ټولګټو وزارت رهبرۍ ته ډاډ ورکړ، چې هڅه کوي د اړونده پروژو چارې په ټاکلي وخت او د پلان سره سم بشپړې کړي.
دا په داسې حال کې ده، چې ټولګټو وزارت په هېواد کې د یو شمېر لویو پروژو کار پیل کړی دی او دا مهال یې د ځينو پروژو کار جریان لري.
