د کابل–جلالآباد مسير په بشپړ ډول د ترافیکو پرمخ پرانیستل شو
د کابل–جلالآباد لويه لاره پرون ۶:۱۵ دقيقې د ټولگټو وزارت د مربوطه پرسونل د شپه او ورځ هڅو په پایله کې، په بشپړ ډول د ترافیکو پرمخ پرانیستل شوه؛ یاده لویه لاره تېره پنجشنبه ماپښين، شاوخوا ۴ بجې د کابل دروازې په درې کیلومترۍ کې، د تنگي غارو په سیمه کې د غرښویېدنې له امله تړل شوې وه.
همداراز، د بدخشان ولايت د فيض آباد-بهارک ولسوالۍ مسير، چې تيره جمعه د شديدو سيلابونو له امله په ۳۰ بیلا بیلو نقطو کې د ترافيکو پرمخ تړل شوی و؛ دامهال يې د پاک کارۍ چارې د ياد ولايت د ټولګټو رياست د پرسونل لخوا په شدت سره جريان لري.
د فيض آباد-بهارک ولسوالۍ مسير څخه تلونکي وسايط کولای شي، چې په يادو سيمو کې د بديل مسير څخه تګ راتګ وکړي.
د یادونې وړه ده، چې د ټولگټو وزارت پرسونل لاهم په سیمه کې شتون لري، ترڅو د سړک زیانمن شوې برخې ترمیم او ياد مسير په بشپړه توګه پاک کاري او د ترافيکو پرمخ پرانيزي.
