سمنګان: د ورېښمو لارې ۱۹ کېلو متره سړک تر کار لاندې دی
د سمنګان ولایت له مرکز ایبک ښار څخه تر زندان درې پورې سړک له وړاندې جوړ شوی و خو په امتداد سره یې د خرم و سرباغ ولسوالۍ تر مرکز پورې څه باندې ۱۹ کیلو متره سړک دا مهال د ټولګټو وزارت له خوا تر کار لاندې دی.
دا سړک د زندان درې د علم کلي له آب لم لم پل څخه بیا د خرم و سارباغ ولسوالۍ تر مرکز پورې غځیږي چې په اوږدو کې یې د ۱۶ او ۲۰ مترو په اوږدوالی سره دوه پلونه، ۶۸ پلګوټي او ۲۶۰ متره کانکریټي لښتې هم شامل دي.
د دې سړک رغنیزې چارې تر اوسه یوازې ۷ سلنه پرمختګ لري چې د ټولګټو وزارت او یوه خصوصي ودانیز شرکت ترمنځ د څه باندې ۳۶۷ ملیونه افغانیو په ارزښت تړون شوې اولګښت یې د هیواد له ملي بودیجې څخه ورکول کیږي.
د دې پروژې د کار پرمهال د سیمې اوسېدونکو ته په مسقیم او غیرمستقیم ډول د ۲۶۸۸۰ کاري ورځو د رامنځته کیدو اټکل شوی چې تر بشپړیدو ورسته به یې ۴۶۰۰۰ کسان په مستقیم ډول ترې ګټه اخلي.
له خرم و سرباغ ولسوالۍ - بیا د بامیانو ولایت تر مرکز پورې د روی دوآب، کهمرد او صیغان ولسوالیو څخه په تېرېدو سره شاوخوا ۱۴۰ کېلومتره نوره لار هم د ټولګټو وزارت په اوږد مهاله پلان کې شته چې سمنګان به د ورېښمو د تاریخي لارې له لارې له بامیانو ولایت سره ونښلوي.
