د لوړ تناژ بار وړونکو وسايطو د کنترول او معیاري وزن د لېږد په اړه د ټولګټو وزارت اعلامیه!
په هېواد کې شته سړکونه او لویې لارې ملي شتمنې ده، چې په لوړ لګښت سره ترمیم او رغول شوي دي، چې ساتنه او څارنه یې د ټولو هېوادوالو دیني وجیبه او ملي مسؤولیت دی.
ټولګټو وزارت ژمن دی، چې په هېواد کې د شته سړکونو د خوندیتوب په موخه له ټاکلي اندازې څخه د ډېر بار لېږد مخنیوی وکړي او له وړاندې ډبل کاري شوې نقلیه وسایط بېرته د مؤلدي کمپني عادي حالت وګرځوي.
په همدې اساس ټولګټو وزارت، ټولو درنو هېوادوالو، ټرانسپورټرانو او د ولوړ تناژ بار وړونکو لېږدونکو وسایطو چلونکو ته یو ځل بیا خبر ورکوي؛ چې د اضافي بار له لېږد څخه دې په جدې توګه ډډه وکړي او معیاري وزن دې ولېږدوي، همدارنګه هغه بار وړونکي موټر چې ډبل کاري شوي دي له ټاکلي نیټې سره سم دې بېرته د مؤلدي کمپني عادي حالت ته بدل کړي او دغه راز دې موټر چلونکي په لویو لارو کې د تګ راتګ پرمهال د تلې (ترازو) له کارکونکو سره له هر ډول شخړي او بحث څخه ډډه وکړي.
د یادونې وړ ده، چې اوس وسایط د اضافي بار لپاره نه جریمه کیږي؛ خو که چېري موټر چلونکي له ټاکلي اندازې څخه ډېر وزن بار او ولېږدوي، نقلیه واسطه به یې د یوې میاشتې له پاره ودرول شي او د سړک خسارې د جبران په موخه به عدلي او قضایې اورګانونو ته ور پېژندل شي.
