لغمان: د مهترلام ـ بادپښ د لومړۍ برخې سړک رغنیزې چارې ۹۰ سلنه بشپړې شوې
د مهترلام – باد پښ سړک لومړۍ برخه چې ۲۰.۶۶ کیلومتره اوږدوالی او ۶ متره پلنوالی لري، د لغمان ولایت له مرکز مهترلام ښار څخه تر بادپښ ولسوالۍ پورې غځیدلی، چې اوس مهال یې رغنیزې چارې له ۹۰ سلنه کاري پرمختګ سره روانې دي.
د سړک دا پروژه د ټولګټو وزارت له لوري د څه باندې ۳۱۹ میلیونه افغانیو په ارزښت له یوه خصوصي ودانیز شرکت سره لاسلیک شوي چې مالي لګښت یې د افغانستان دولت له پراختیایي بودیجې څخه ورکول کیږي.
یاد سړک د لغمان ولایت د بادپښ ولسوالۍ د اوسېدونکو لپاره ځانګړی اقتصادي او ټولنیز ارزښت لري، چې د کار په جریان کې یې د سیمې ګڼو اوسېدونکو ته کاري بوختیاوې رامنځته شوې دي.
د مهترلام ـ بادپښ سړک له بشپړېدو سره به نه یوازې یاده ولسوالي له مرکز سره ونښلي بلکي د کرنیزو حاصلاتو، میوو دانو په لېږد او روغتيايي مرکزونو ته د خلکو په اسانه لاسرسي کې به هم ډېره مرسته وکړي.
د یادونې وړ ده، چې د مهترلام - بادپښ سړک ټولټال څه باندې ۴۱ کیلومتره اوږدوالی لري چې په دوو برخو ویشل شوی او د دویمې برخې رغنیزې چارې یې هم روانې دي.
