د خاص ارزګان – ترینکوټ ۲۵ کیلومتره سړک د اساسي رغونې چارې د څه باندې ۶۰۱.۶ میلیونه افغانیو په ارزښت پيل شوې
د ا.ا.ا د ټولګټو وزارت له لوري په ارزګان ولایت کې د خاص ارزګان – ترینکوټ سړک لومړي لاټ د اساسي رغونې چارې د څه باندې ۶۰۱.۶ میلیونه افغانیو په ارزښت د ارزګان ولایت د والي مرستیال محترم الحاج مولوي باري ګل طالب، د یاد ولایت د ټولګټو رئیس محترم الحاج مولوي ادم جان نعماني او شمېر سیمه ییزو مسئولینو په شتون کې رسماً پيل شوې.
دغه سړک د ارزګان ولایت د مرکز ترینکوټ له مهر آباد کلي څخه پیل د یاد ولایت تر خاص ارزګان ولسوالۍ پورې رسیږي، چې ۲۵ کیلومتره اوږدوالی لري او په اوږدو کې یې د ۱۱ پایو پلونو او ۱۴۶ پایې پلګوټو د رغونې چارې هم شاملې دي.
د دغې پروژې رغنیزې چارې به د ٢٦ کاري میاشتو په موده کې بشپړې او ګټې اخیستنې ته وسپارل شي.
د یادونې وړ ده، چې د یاد سړک د کار په جریان کې به د سیمې یو شمېر اوسېدونکو ته د کار زمینه برابره شي او د کار په بشپړېدو سره به یې پر یاد مسیر د مسافرینو د تګ راتګ، د سوداګریزو توکو او کرنیزو محصولاتو د لېږد په برخه کې د پام وړ اسانتیاوې رامنځته شي.
