د ټولګټو وزارت سرپرست له ترکي ۷۷ ساختماني شرکت څخه لیدنه وکړه
د ټولګټو وزارت سرپرست محترم الحاج ملا محمدعیسی ثاني، تېره ورځ په افغانستان کې د ترکي ۷۷ ساختماني شرکت د بېلابېلو څانګو څخه د لیندني ترڅنګ د یاد شرکت له مسؤولینو سره وکتل او خبري یې وکړې.
په دغه لیدنه کې، لومړۍ په افغانستان کې د ترکي ۷۷ ساختماني شرکت مرستیال براق انسال، په افغانستان کې د یاد شرکت د راتلونکو پلانونو او پروژو په اړه هر اړخیز معلومات وړاندې کړ او څرګنده یې کړه، چې په هیواد کې د ویجاړو پُلونو او پُلګټو د ترمیم او بیارغونې په برخه کې له ټولګټو وزارت سره همکاري ته چمتو دي، دغه راز غوښتنه یې وکړه، چې دا وزارت دې د ۷۷ ساختماني شرکت له شته امکاناتو او تجربو څخه ګټه پورته کړي.
ورسته د ټولګټو وزارت سرپرست وزیر محترم الحاج ملا محمدعیسی ثاني، په افغانستان کې د ترکیې ۷۷ ساختماني شرکت پر فعالیتونو خوښي څرګنده کړه او په هیواد کې د ویجاړو سړکونو، پُلونو او پُلګټو د ترمیم او بیارغونې په برخه کې یې د یاد شرکت د پاملرني غوښتنه وکړه.
د لیدنې په پای کې د ټولګټو وزارت سرپرست وزیر، یاد ساختماني شرکت ته له خپل لوري څخه د هر ډول همکاري ډاډ ورکړ او د همغږۍ پر دوام یې ټینګار وکړ.
