د اوسپنې پټلۍ د نړیوالې اتحاديې (UIC) ۳۴مه سيمه ييزه غونډه په ترکیه کې ترسره شوه
د اوسپنې پټلۍ د نړیوالې اتحاديې (UIC) ۳۴مه سيمه ييزه غونډه د روان ميلادي کال د نومبر مياشتې په ۲۸مه د ترکیې په پلازمېنه استانبول ښار کې د ۱۶ غړو هيوادونو د استازو په ګډون ترسره شوه.
په غونډه کې لومړی د يادې اتحاديې عمومي رئیس محترم آلان بيراود د خپلې وينا پرمهال، په تېر يوه کال کې د اوسپنې پټلۍ اړوند د سیمه ییزو همکاریو او لاسته راوړنو په تړاو مفصل معلومات وړاندې کړل.
ورپسې د ترکیې د اوسپنې پټلۍ عمومي رئيس محترم ويسي کورت او د منځني ختيځ د سيمه ييزې ټولنې (RAME) د دفتر رئيس د خبرو پرمهال د اوسپنې پټلۍ پر بنسټيزه پراختيا او معياري کولو او د سوداګريزو توکو د لېږد-رالېږد په برخه کې د شته خنډونو او ننګونو په لمنځه وړلو ټينګار وکړ.
د غونډې په دوام د ا.ا.ا د ټولګټو وزارت د اوسپنيزې کرښې مرستيال محترم مولوي محمد اسحاق صاحبزاده د خپلې وينا پرمهال وويل: «دا چې د اوسپنې پټلۍ د بنسټونو رغول او معياري کول يو ملي او نړيوال بعد لري، خو د ا.ا.ا ته د تيرو څو لسيزو پاتې ستونزو او ننګونو سره-سره د اوسپنې پټلۍ بنسټیزه پراختيا کاري لومړيتوب لري.»
نوموړي د سيمه ييزو هيوادونو استازو ته ډاډ ورکړ، چې د ا.ا.ا د غوره سوداګريزو اړيکو ساتلو په موخه د اوسپنې پټلۍ بنسټیزې پراختيا، د ګټې اخيستنې د خدماتو کيفيت لوړولو او ساتنې او څارنې په برخه کې اغيزمنو هڅو ترسره کولو ته ژمن دی.
د غونډې پرمهال د اوسپنې پټلۍ د نړیوالې اتحاديې استازو ژمنه وکړه، چې په راتلونکو روزنیزو کورسونو کې به د افغانستان د اوسپنې پټلۍ کارکوونکو ته بلنه ورکړي، ترڅو ددې اتحاديې له لوري په چمتو کېدونکو ځانګړو روزنیزو کورسونو کې برخه واخلي.
په غونډه کې د اوسپنې پټلۍ د نړیوالې اتحاديې او منځني ختیځ د سيمه ييزې ټولنې د استازو لخوا د وروستيو فعالیتونو، لاسته راوړنو، تر کار لاندې پروژو او راتلونکو پلانونو په تړاو مفصل کلنی راپور وړاندې شو.
د ا.ا.ا په استازيتوب د ټولګټو وزارت د اوسپنيزې کرښې د معینیت له لوري د افغانستان د اوسپنې پټلۍ د وروستيو پرمختګونو، تر کار لاندې پروژو، لاسته راوړنو او راتلونکو درې کلنو لومړيتوبونو په تړاو مختصر راپور وړاندې شو، چې د ګډونوالو د تود هرکلي سره مخ شو.
۱۰ قوس د ټولګټو وزارت رسنيز دفتر
