د کابل – کندهار لویې لارې اړوند د نورک – مقر ۷۸ کیلومتره سړک د اسفالټ د دویمې طبقې چارې به په نږدې ورځو کې بشپړې شي
د کابل – کندهار لویې لارې اړوند د نورک – مقر ۷۸ کیلومتره سړک د بیارغونې چارې په دوو لاټونو کې د ټولګټو وزارت او خصوصي سکتور ترمنځ د ۲.۷ میلیارده افغانیو په ارزښت قرارداد شوې وې، چې د اسفالټ د دویمې طبقې چارې به یې په نږدې ورځو کې بشپړې شي او دریمې طبقې کار به یې په راتلونکي کال کې بشپړشي.
ټولګټو وزارت د کابل – کندهار لویې لارې د اساسي بیارغونې چارې په بېلابېلو برخو کې له خصوصي سکټور سره قرارداد کړي دي او دا مهال یې د اساسي بیارغونې کار په چټکۍ سره جریان لري.
د یادونې وړده، چې یاد وزارت څه موده وړاندې د کابل – کندهار لویې لارې اړوند د کابل – غزني برخې د شاوخوا ۱۰۲ کیلومتره سړک د اسفالټ اچونې چارې بشپړې کړې دي او د یاد مسیر د ځینو نورو برخو کار به په نږدې راتلونکي کې بشپړ او ګټې اخیستنې ته و سپارل شي.
کابل – کندهار لویه لار د هیواد له مهمو او اقتصادي لویو لارو څخه ده، چې د هیواد له مرکز کابل سره د جنوبي او جنوب لوېدیځو ولایتونو پر نښلولو سربېره افغانستان د ګاونډیو هیوادونو له لارې له منځنۍ آسیا سره نښلوي.
د یادې لویې لارې په ترمیم او بیا رغونې سره به د ملي سوداګرو، موټر چلوونکو او تلونکو مسافرو د تګ راتګ ستونزې د پخوا په پرتله هوارې شي، د کرنیزو او سوداګریزو توکو په چټک او خوندي لیږد رالیږد کې به د پام وړ اسانتیاوې رامنځته شي.
ټولګټو وزارت تل هڅه کوي، چې د لویو لارو، سړکونو او اسپنیزې کرښي په رغولو، ترمیم او بیارغولو سره درنو هیوادوالو ته بشپړې اسانتیاوې رامنځته کړي.
11قوس د ټولګټو وزارت رسنیز دفتر
