د کمپنۍ له پله د میدان وردګو تر دُراني بازاره، د دویم لین سړک رغنیزې چارې ۲۷ سلنه پرمختګ لري
دا سړک چې ۲۴.۵ کیلومټره اوږدوالی او ۱۱.۳ متره پلنوالی لري، د کابل ښار د پنځمې ناحیې اړوند له کمپنۍ پُل څخه پیل او د میدان وردګو ولایت تر دُراني بازار پورې غځیږي، چې اوس مهال یې رغنیزې چارې له ۲۷ سلنه کاري پرمختګ سره روانې دي.
د دې سړک په اوږدو کې دری پُلونه، ۶۰ پآیې پُلګوټي، ۱۳۱۰ متره مکعب استنادي دیوال او ۸.۶۱۸ کیلومتره د اوبو ویالې هم شامل دي.
د یاد سړک د رغنیزو چارو تړون د ټولګټو وزارت او یوه خصوصي ودانیز شرکت ترمنځ لاس لیک شوی، چې مالي لګښت یې د هېواد له ملي بودیجې څخه ورکول کېږي.
دا پروژه د کابل ـ هرات لویې لارې د دویم لین سړک یوه برخه ده، چې ټولګټو وزارت یې په راتلونکې پلان کې تر کندهار ولایت پورې غځول په پام کې لري.
د یادونې وړ ده چې په دې پروژه کې د کمپنۍ دوه پلونه هم شامل دي، چې هر یو یې ۵۶ متره اوږدوالی لري او اوس مهال د یوه پله رغنیز کار بشپړ شوی او ګټې اخیستنې ته چمتو دی او پر بل یې کار دوام لري.
